【靈戲逼人】與蔡國威相識廿載合作演劇一拍即合　李漫芬含淚打衰老公

TVB《靈戲逼人》下周迎來結局周，本星期劇情進入高潮，Ivan（張振朗飾）與女鬼柳芳（龔嘉欣飾）的感情將逐步升溫；今晚（7月20日）亦再有重要新角色登場，從而逐步揭開柳芳生死之謎、及與雲哥（張振朗分飾）的關係。

昨晚（7月19日）《靈戲逼人》的兩大重點場口除Ivan與柳芳的沙灘浪漫談情戲，還有阿麗（劉芷玲飾）父親本山（蔡國威飾）與麗母（李漫芬飾）的街頭衝突戲。

爭落周身債務的本山「離家出走」多時，麗母除要照顧女兒、還要照顧本山父親，身心疲累。昨晚潛逃多時的本山終現身，麗母激動上前爆喊指責之餘，更擸袋怒打本山，二人最終抱頭痛哭大團圓，場面感人。

之前憑《新四十二章》的「瘋狂黑社會大家姐」贏盡焦點的李漫芬（Fanny），是次再轉畫風飾演苦命盡責師奶仔，昨晚街頭爆Seed一幕再度發揮「瘋狂」本色，全程聲嘶力竭但沒有硬谷眼淚，只是keep住有淚光在眼眶打轉，一頭亂髮更突顯了角色的無力感。

Fanny受訪時，透露與威仔相識超過廿載，故拍攝前能放膽溝通，「怒打」對方時亦份外放心，她說：「場戲喺西貢拍，當時好多人圍觀，有啲仲喺二樓望落嚟。記得綵排時我情緒已經到，到真拍時係一SHOT落，拍完導演都有讚話感動，我好開心。」

獲封新一代八婆

Fanny又感謝監製Simon給予她如此有發揮的角色，笑言最大突破是終可暫別「八婆」生涯：「我記得拍完《致命復活》，郭晉安話我係新一代八婆人選，家豪哥同小青姐再將我升華咗做貴婦八婆。

之後多謝陳維冠監製搵我做黑社會大家姐，嗰次又學開槍又學霸氣，令我有新嘅成就解鎖。今次再轉演賢良淑德同受盡委屈嘅角色，我都有花心思喺對白語氣度，希望能夠令觀眾感受到我嘅委屈，好多謝監製信任我，亦多謝編劇寫得咁好，令到我投入幻想到自己有個衰老公，係好玩嘅。」

未試過「有咁大個女」

至於威仔，則笑指角色最特別是「有咁大個女」，並謂刻意讓自己「頭髮亂了」配合角色。

他解釋稱：「其實呢個不負責任爸爸本身係好人，只係為咗某啲原因要走佬，所以造型方面一定唔會四正，應該要落泊啲、頹啲同不修邊幅啲，咁啱嗰日西貢好大風，我就由自己個頭有咁亂得咁亂。」

威仔又笑指Fanny拍怒打他戲份時，其實經過多番掙扎：「我一開始就叫佢放膽打我，叫佢用任何手上嘅嘢揼過嚟，尤其佢手上面嗰十卷廁紙，總之就係唔使留力同驚整親我。」

他續指：「但Fanny都仲係錫住我，最初試戲時仲係有啲留手，好彩後尾大家感情都到，表現到我個內疚同佢嘅原諒。雖然短短兩場戲但真係過足戲癮，我都少拍呢類戲，所以好多謝監製畀機會。」

最新影片推介：陳瑞菱專訪